Avropa-mühacirlər-diskriminasiya
Balayev Xaqan
AMEA İnsan Hüquqları üzrə Elmi-Tədqiqat
İnstitutunun “Siyasi analitika” şöbəsinin böyük
elmi işçisi, siyasi elmlər üzrə fəlsəfə doktoru
AVROPA-MÜHACİRLƏR-DİSKRİMİNASİYA
Hər bir mühacirət insanların sadəcə mexaniki yerdəyişməsi yox, siyasi və sosial-iqtisadi həyatın müxtəlif sahələrinə təsir göstərən mürəkkəb ictimai prosesdir, özünəməxsus siyasi, hüquqi, etnik-milli, sosial, iqtisadi, demoqrafik, hətta ekoloji aspektlərə malik olur və müvafiq problemlər doğurur.
Son zamanlar Yaxın Şərq böhranı ilə əlaqədar dünyanın geostrateji durumunda bəşər tarixinin analoqu olmayan mühacir dalğası yaşanmaqdadır. Rəsmi mənbələrin məlumatına görə bu gün vətənlərini tərk edərək mühacir həyatı yaşamağa məcbur olan insanların dünya üzrə ümumi sayı 60 milyona qədərdir. Müqayisə üçün deyə bilərik ki, bu II dünya müharibəsinin bitməsindən sonra baş vermiş mühacir dalğasından (o zaman qaçqınların sayı 17 milyon təşkil etmişdi) 4 dəfə çoxdur. Mühacirət edənlərin böyük əksəriyyəti Liviya, Tunis, Suriya, Pakistan, Əfqanıstan, Banqladeş kimi xaos və anarxiyanın hökm sürdüyü ölkələrin vətəndaşlarıdır. Dünyanın bir sıra bölgələrinə səpələnmiş bu insanların üz tutduğu əsas regionlardan biri Avropa İttifaqı dövlətlərinin ərazisidir. Mühacirlərin mühüm bir qismi burada məskunlaşmaq istəmiş, müəyyən qruplar halında Aralıq dənizi vasitəsilə Avropaya köç etməyə başlamışdır. Qaçqınların qərbdə üzləşdiyi ilk və ən ciddi problemlərdən biri sığınacaq məsələsi ilə bağlı olmuş, bir çox hallarda onlar üçün bu sahədə maneələr yaradılmışdı. “Sığınacaq hüququ”nun beynəlxalq hüquq təsisatı (institutu) kimi meydana çıxması burjua inqilabları dövrünə aiddir (ilk dəfə 1789-cu ildə Fransa burjua inqilabı zamanı elan olunmuşdur) və adətən siyasi mühacirlərə şamil edilir. Mahiyyəti etibarilə dövlətin siyasi, yaxud elmi fəaliyyətlərinə görə təqib edilən xaricilərin öz ərazisinə gəlməsinə və orada olmasına icazə vermək hüququdur. Xarici vətəndaşı öz ərazisinə buraxmaq, yəni sığınacaq hüququ vermək məsələsini bu və ya digər dövlət öz dövlətdaxili aktlarına (xüsusi qanun, konstitusiya) əsasən həll etmək hüququna və səlahiyyətinə malikdir. Bu mənada siyasi sığınacaq hüququ vətəndaşa yox, dövlətə məxsusdur. Dövlət öz suverenliyinə əsaslanaraq, beynəlxalq və daxili hüquqa uyğun olaraq sığınacaq almaq haqqında müraciət edən şəxsin xahişini təmin, yaxud rədd edir.
“İnsan hüquqları haqqında ümumi bəyannamə”nin 14-cü maddəsinin 1-ci bəndi ilə sığınacaq hüququ qismən vətəndaşa da aid edilmişsə də (“Hər bir insan təqibdən yaxa qurtarmaq üçün başqa ölkələrdə sığınacaq axtarmaq və bu sığınacaqdan istifadə etmək hüququna malikdir), siyasi proseslərin sonrakı gedişatı göstərmişdi ki, təcrübədə bu elə bir əhəmiyyət kəsb etməmişdir. Bu aspektdə mühacir qruplarının Avropaya gəlişi intensivləşən kimi (2015-ci ilin yayından etibarən bu proses geniş vüsət almışdı) qərb siyasətçiləri bunu çox sərt reaksiya ilə qarşılamışlar. Mühacirət edənlərin sayı çoxaldıqca onların qəbulu və yerləşdirilməsi zərurətə çevrilmişdi. Almaniya və Skandinaviya dövlətləri qaçqınların Avroittifaq ölkələri üzrə paylaşdırılmasının kvota prinsipini təklif etsələr də (bu müddəaya görə hər bir ittifaq üzvünə müəyyən mühacir faizi ayrılmalı və həmin dövlət onları öz ərazisində yaşayış yeri ilə təmin etməli idi), Şərqi və Cənubi Avropa ölkələri bu təklifə müxalif mövqedən yanaşmış, müxtəlif iqtisadi problemlərini bəhanə gətirərək ona etiraz etmişdilər. Göründüyü kimi bütün bu proseslərin nizamlanmasında ilk mərhələ olan qaçqınların qəbulu və yerləşdirilməsi məsələsində Avropa Birliyi vahid siyasi doktrinaya riayət edə bilməmişdir. Bu isə öz növbəsində Avropada mühacir böhranının meydana çıxmasına səbəb olmuşdur. Hər zaman özünü insan hüquqları prinsiplərinin, tolerantlığın, multikulturalizmin vətəni kimi təqdim edən qərb bu kontekstə müvafiq qaçqınlarla həmrəylik nümayiş etdirməli, onların maraqlarını nəzərə almalı idi. Reallıqda isə biz bu gün tam fərqli mənzərə ilə rastlaşmış oluruq, müəyyən hallar istisna edilməklə qaçqınlara nəinki humanizm nöqteyi-nəzərindən yanaşılmamış, hətta bir sıra məqamlarda onlar irqçi-şovinist ünsürlərin təzyiqlərinə məruz qalmışdır. Avropa KİV-lərində mühacirlərə qarşı kəsin bəyanatlar səslənmiş, nümayişlərdə və digər etiraz aksiyalarında diskrimaniya xarakterli çıxışlar edilmişdir. Bu formatda cərəyan edən hadisələrə diqqət yetirdikdə görürük ki, qaçqınlar əleyhinə olan kampaniyada tək ekstremist yönlü təşkilatlar deyil, eyni zamanda nüfuzlu qərb siyasətçiləri də fəal iştirak etmiş və etməkdədirlər. Bu proseslər fonunda Fransanın xarici işlər naziri Loran Fabius qaçqınlara qarşı yönəlmiş ilk bəyanatlardan birini vermişdir. Belçikanın Soir qəzetinə verdiyi müsahibəsində o bildirmişdi ki, “Avropa başqa böhranlara da şahid olmuşdur, lakin bu məsələ də müəyyən qədər Avroittifaqın öz mövcudluğu sual altına qoyulmuşdur. Əgər hər bir kəs fikirləşirsə sərhədlərində nəzarəti gücləndirməklə böhrandan çıxa biləcək-bu illüziyadır. Açıq şəkildə deməliyik ki, qaçqınlara münasibətdə həmrəylik halları istisna olmaqla, Aİ bütün iqtisadi mühacirlər üçün qapılarını aça bilməz. Əks təqdirdə mühacirlərin axını nəzarətdən çıxar, bu isə öz növbəsində Avropa sisteminin tənəzzülü və cəmiyyətin radikallaşması ilə nəticələnər”.
Avroittifaq ölkələri arasında Macarıstan rəhbərliyi mühacirlərə qarşı ən kəskin mövqeyi ilə fərqlənmişdir. Bu ölkənin baş naziri Viktor Orbanın çıxışı öz şovinist əhval-ruhiyyəsi və antiislam ritorikası ilə xüsusi seçilirdi. Onun çıxışından bəzi məqamlara diqqət yetirək, “Əgər qaçqınların axını dayandırılmasa, Avropada xristianlar azlıqda qalacaq, Avroittifaq isə öz identikliyini itirəcək. Avropa siyasətçiləri təsəvvür belə etmirlər ki, gəlmələr bizim üçün necə böyük təhlükədirlər. Onlar problemin miqyasından şübhələnmirlər – söhbət on milyonlarla insandan gedir. Biz onların hamısını buraxsaq, Avropa məhv olacaq. Miqrasiya nəticəsində müsəlmanlar yaxın zamanda Avropada çoxluq təşkil edəcəklər. Avropa bu mədəniyyətlər arasında rəqabətə imkan yaratsa xristianlar uduzacaqlar”.
Göründüyü kimi qərb siyasətçiləri öz çıxışlarında açıq şəkildə cəmiyyətə irqçi təbliğatlarını aşılayır, müsəlmanların Avropaya gəlişinin qarşısını almağa çağırırdılar. Əgər fransız nazirin çıxışı müəyyən qədər diplomatik-humanist tonlarla pərdələnmişdisə, macar siyasətçisi barədə bunu qətiyyən deyə bilmərik, onun nitqi üçün tam barizliyi ilə ifrat millətçilik səciyyəvi idi. Obyektivlik naminə qeyd etməliyik ki, Viktor Orbanın bu bəyanatı Avroparlamentdə də narazılıqla qarşılanmış, bəzi deputatlar ona qarşı sərt fikirlərini səsləndirmişdilər.
Avroittifaq liderləri arasında istisna hal kimi Almaniyanın baş naziri A. Merkelin mövqeyini göstərə bilərik. O, bəyan etmişdi ki, “mühacirlər üçün qapımız açıqdır, Almaniyaya gələn istənilən hər bir kəs sığınacaq əldə edə bilər”. Merkelin bu bəyanatı nəinki Almaniyada, həmçinin Avroittifaqın özündə də ciddi etirazlarla qarşılanmış, qərbin nüfuzlu mətbu orqanlarında onun əleyhinə tənqidi yazılar dərc edilmişdi. Bu hadisələrdən bir qədər sonra Almaniyanın xarici işlər naziri Frank Valter Ştaynmayer jurnalistlərə verdiyi müsahibəsində öz baş nazirinin sözlərinə aydınlıq gətirərək vurğulamışdı ki, Almaniya yalnız müharibə və zorakılıqdan qaçan insanlara sığınacaq verəcək. 2015-ci ilin sentyabrında isə Almaniyanın miqrasiya qanununda mühacirlərin gəlişini məhdudlaşdırmaq məqsədilə dəyişikliklər edilmişdi. Digər tərəfdən Almaniyanın bir sıra şəhərlərində ekstremist yönlü partiyaların təşəbbüsü ilə kütləvi antiislam nümayişləri keçirilmişdi. Bu aksiyalarda “Patriotik avropalılar” hərəkatı xüsusi fəallıq göstərmişdi. Onlar Drezdendə 25 min nəfərin qatıldığı küçə nümayişi keçirmişdilər. Avropa Şurası Almaniyada irqçi meyllərin güclənməsi ilə əlaqədar öz müraciətini yaymışdı. Burada deyilirdi, “Narahatlıq doğuran hadisələr baş vermiş, irqçilik və ksenofobiya şüarları səsləndirilən nümayişlər keçirilmişdi. Dözümlülüyün və mədəniyyətlərarası dialoqun yaradılması üçün lazımi tədbirlər görülməlidir”.
Bu tipli sənədlər sırf hüquqi xarakterli olub, mühacirlərin ümumi vəziyyətinə təsir etmirdi. Eyni zamanda vurğulamalıyıq ki, Almaniyada bu kimi hallara baxmayaraq, qaçqınların ən çox diskriminasiyaya məruz qaldıqları ölkələr Slovakiya, Çexiya, Macarıstan, Polşa olmuşdur. Burada cəmiyyətin böyük əksəriyyəti qaçqınlara qarşı çıxmışdır. Macarıstan bu sahədə yenə də fərqlənmiş, mühacirləri ölkəsinə buraxmamaq üçün Xorvatiya və Serbiya ilə sərhədlərini bağlamışdır. Burada bir məqama da diqqət yetirməliyik ki, Almaniya kimi multikulturalizm ideyalarının (son zamanlar bu siyasətdə ciddi deformasiya prosesləri özünü göstərir) geniş yayıldığı ölkədə qaçqınlara şovinist münasibət göstərilmişdirsə, Şərqi Avropanın tarixən monomilli ənənəyə malik dövlətlərindən onlara qarşı humanist prinsiplərin tətbiq edilməsini gözləməyə dəyməzdi. Xorvatiyada isə qaçqınlar ümumiyyətlə taleyin ümidinə buraxılmışdılar. BMT-nin qaçqınların işləri üzrə komissarı Rafal Kostjinski Xorvatiyada gördüklərini belə şərh etmişdi. “Onlara ən sadə humanitar yardım belə göstərilməmişdir. Ən acınacaqlısı isə odur ki qaçqınlara heç kəs heç bir məlumat vermir. Qaçqınlar tam qeyri-müəyyənlik vəziyyətindədirlər. Xorvatiya hökuməti mühacirlərə kömək etmək əvəzinə onları Macarıstana göndərir”.
Beləliklə qeyd olunan faktorlara yekun olaraq deyə bilərik ki, insan hüquqlarının aliliyini, tolerantlığı, multikulturalizmi və digər ümumbəşəri dəyərləri öz dəyişməz dövlət siyasəti elan etmiş Avropada hal-hazırda tam fərqli durum hökm sürür. İrqçilik, ksenofobiya, gəlmələrə qarşı diskriminasiya meylləri nəinki azalmır əksinə daha da intensivləşməkdədir. Bütün bu proseslər kontekstində qərb cəmiyyətlərində şovinizm təzahürləri güclənməkdə və özünə tərəfdarlar toplamaqdadır.
Dərc olunub : 11-12-2017
Oxunma sayı : 55