Hüquq və İnsan Haqları İnstitutu martın 17-də 24 nəfər gənc üçün “Sosial davranış. Polis və gənclər” mövzusunda məlumat sessiyası təşkil edib.  

Gənclər üçün nəzərdə tutulan bu sessiyada sosial davranışın müxtəlif aspektləri, hüquqi normalar və onların insan hüquqları ilə əlaqəsi, həmçinin rəqəmsal mühitdəki sosial davranışların müasir təhdidləri müzakirə olunub.

Sessiyada İnstitutun təlimçi-eksperti Zümrüd Əlizadə və təlimçi Əmrah Rəhimli etik dəyərlərə və sosial normativlərə əsaslanan davranış təsirləri, fərdi və kollektiv məsuliyyət, pozitiv və neqativ davranış, habelə ayrı-seçkiliyin yolverilməzliyi, gender və irqi bərabərlik, ifadə azadlığı kimi əsas prinsiplərdən bəhs ediblər. Eyni zamanda, insan hüquqlarının təmin olunmasında polisin rolu, polisin etik davranış kodeksi kimi vacib mövzular üzrə müzakirələr aparılıb.

Qeyd edək ki, bu cür məlumat sessiyaları sosial davranışın müxtəlif aspektləri ilə bağlı vacib məsələləri müzakirə etməklə yanaşı, gənclərin hüquq sahəsindəki anlayışlarını dərinləşdirmək, onların sosial davranışlarını daha məsuliyyətli şəkildə formalaşdırmaq üçün lazımlı bir töhfədir.