“Konstitusiyanın təxminən üçdə biri məhz birbaşa insan hüquq və azadlıqlarının təsbitinə və qorunmasına həsr olunmuşdur (24-71-ci maddələr)” – bu fikirlər Hüquq və İnsan Haqları İnstitutunun fevralın 28-də gənclər üçün təşkil etdiyi məlumat sessiyasında şöbə müdiri Vüsalə Muradxanlı tərəfindən səsləndirilib.

İnstitutun 28 fevral və 5 mart tarixlərində “Əsas insan hüquqları və azadlıqlarının Azərbaycan Respublikasının Konstitusiyasında təminatı” mövzusunda keçirdiyi məlumat sessiyasında gənclər xüsusi diqqət mərkəzinə çəkilib.

Təlimçi-ekspert Hamlet Babayev iştirakçılara universal insan hüquqları konsepsiyasının mahiyyətini izah edərək, Azərbaycan Respublikasının 1995-ci il Konstitusiyası: təsbit olunmuş əsas insan hüquq və azadlıqları, həmçinin Beynəlxalq hüquq müdafiə mexanizmlərindən bəhs edib.

Sessiyada mədəni hüquqlar, təhsil, əmək, mənzil hüquqları, ana dilindən istifadə hüququ, yaradıcılıq azadlığı, ekoloji hüquqlar, mülki və siyasi hüquqlar barədə məlumatlar da yer alıb.

Məlumat sessiyasında müxtəlif ali təhsil ocaqlarının tələbələri, gənclər və ictimai fəallar olmaqla, ümumilikdə 27 nəfər gənc iştirak edib.