Açıqlama:

1918-ci ildə Azərbaycan ərazisində demokratik, hüquqi əsaslara söykənən müstəqil bir dövlətin yaranması Azərbaycan cəmiyyətinin və xalqının sosial-siyasi və hüquqi həyatının kökündən yenilənməsi istiqamətində geniş miqyaslı işlərin həyata keçirilməsinə təkan vermiş oldu. İctimai-siyasi həyatın bütün sahələrində münasbətlərin nizama salınması məqsədilə yeni normativ aktların qəbul edilməsi və bir çox sahələrdə islahatlara başlanılması bütövlükdə həmin dövrdə baş verən hüquqi prosesləri müsbət yönümdə xarakterizə etməyə imkan verir. Məqalədə baxılan dövrdə əhalinin əmək və sosial təminat sahəsində hüquqlarının tənzimi və qəbul edilən normativ hüquqi aktların realizəsi üzrə yeni dövlətin fəaliyyəti araşdırılır və ümumən Cümhuriyyətin həyata keçirdiyi sosial-hüquqi siyasətin əsaslarına aydınlıq gətirilir.