Məqalədə xüsusi (hibrid) məhkəmə orqanlarının fəaliyyətində müharibə cinayətlərinə görə məsuliyyətə cəlbetmə problemi hüquq ədəbiyyatında mövcud fikir müxtəlifliyi və beynəlxalq praktika əsasında geniş təhlil edilir. Qeyd edilir ki, müharibə cinayəti anlayışının formalaşması yalnız nəzəri işin (müxtəlif konsepsiya, nəzəriyyə və baxışların) yox, həmçinin hüquq normalarının tətbiqi ilə meydana çıxan praktiki işin nəticəsində formalaşır. Bu cəhətdən beynəlxalq tribunallar və Beynəlxalq Cinayət Məhkəməsi ilə yanaşı, xüsusi (hibrid) məhkəmələr də bu istiqamətdə mühüm rol oynayırlar. Qeyd edilənləri nəzərə alaraq bu istiqamətdə həmin təcrübənin də ətraflı öyrənilməsi, beynəlxalq praktikanın və milli qanunverciliklərin zənginləşdirilməsi zəruridir.
Müəllif :
Mehriban Eyyubova - hüquq üzrə fəlsəfə doktoru, Bakı Dövlət Universitetinin dosenti
Nəşr tarixi : 2021
İnsan orqan və ya toxumalarının transplantasiyası şəxsiyyətin tamlığına, bütövlüyünə müdaxilənin bir növüdür. Bu müdaxilə müvafiq tələblər çərçivəsində həyata keçirildikdə hüquqa uyğun qəbul edilir və şəxsiyyətin hüquqlarına, həyat və sağlamlığına təcavüz kimi xarakterizə edilmir. Lakin son illərdə orqan və ya toxumaların köçürülməsinin getdikcə daha geniş vüsət alması, tibbi imkanların inkişafı, insanların sağlamlığının bərpası üçün orqan və toxumaların nəql olunmasına ehtiyacın artması və s. amillər insan orqan və ya toxumalarının qanunsuz olaraq transplantasiya məqsədilə götürülməsinə, orqan və ya toxumaların ticarətinin genişlənməsinə gətirib çıxarmışdır. Buna görə də bir çox dövlətlərdə, o cümlədən ölkəmizdə bu sahəni tənzimləyən hüquqi aktlar qəbul edilmişdir. Məqalədə transplantasiya məqsədilə qanunsuz olaraq meyit donor orqanlarının götürülməsi əməli cinayət hüququ çərçivəsində təhlil olunur.
Müəllif :
Jalə Qənbərova - Bakı Dövlət Universitetinin Cinayət hüququ və kriminologiya kafedrasının doktorantı
Nəşr tarixi : 2021
Bu məqalə son dövrlərdə aktuallıq qazanmış İnklüzivlik -ekstraktivlik nəzəriyyəsinin bir ölkənin hüquqi sisteminə mümkün təsirlərinə həsr edilmişdir. Məqalədə inklüziv və ekstraktiv institutlardan bəhs edilməklə bərabər hüquq, iqtisadiyyat və siyasət paralel şəkildə təhlil edilmiş, dövlətin siyasi və iqtisadi funksiyalarına yer ayrılmışdır. Həm tarixi təşəkkül prosesindən, həm də müasir dövrdən müxtəlif nümunələr gətirilmiş və ətraflı müqayisə edilmişdir. Sözügedən məsələlərin təh-lili üçün siyasi və iqtisadi ədəbiyyata da müraciət edilmişdir.
Müəllif :
Siyavuş Bağırov
Nəşr tarixi : 2022
Məqalədə dördüncü sənaye inqilabı dövründə hüquqi tənzimlənmənin rolu qabardılır və istiqamətin perspektivləri aşıqlanır. Qeyd olunur ki, dünyada hüquqi tənzimləmənin səmərəliliyi cəmiyyətin hüquq fenomeni ilə tanışlıq dərəcəsindən asılı olacaq. 4.0 sənaye inqilabının tələb və standartlarına uyğunlaşdırılmış hüquqi tədrisə dair tezisləri aşıqlanır. Müəllif razılaşır ki, 4.0 sənaye inqilabının gedişində hüququn tədrisinin ən ümdə məqsədlərindən biri, digər elmlər və tədris fənləri kimi, “futurist təfəkkürə malik insanların” yetişdirilməsinə səy göstərmək olmalıdır.
Müəllif :
Ramin Əliyev
Nəşr tarixi : 2022
Məqalədə nikahın pozulması haqqında işlər üzrə məhkəmə baxışının xüsusiyyətləri təhlil edilir. Bu məqsədlə hüquq doktrinasın və milli qanunvericiliyin mövqeyi araşdırılır. Eyni zamanda məhkəmə təcrübəsi analiz edilir, problemlə bağlı Konstitusiya Məhkəməsi Plenumunun və Ali Məhkəmənin Plenumunun qərarlarının təcrübi əhəmiyyəti təhlil edilir. Qeyd olunur ki, nikahın məhkəmə qaydasında pozulmasının prosessual xüsusiyyətləri bir qayda olaraq iki şərtlə müəyyən edilir: 1) ər-arvadın qarşılıqlı razılığının olması ilə; 2) ər-arvadın yetkinlik yaşına çatmayan ümumi uşaqlarının olması ilə.
Müəllif :
İsmayıl Qəribli - Naxçıvan Dövlət Universitetinin müəllimi
Fərəh Miriyeva - Naxçıvan Dövlət Universitetinin magistrantı
Nəşr tarixi : 2021
Qadın hüquqlarının qorunması və gender bərabərliyi problemi hər şeydən əvvəl ölkədə insan hüquqları üzrə qanunvericiliklə bağlıdır. Lakin cəmiyyətdə tarixən formalaşan adət-ənənələr, iqtisadi konyunktura, təhsil səviyyəsi və sair amillər də təsirsiz ötüşmür. Elə ona görə də ölkələr qadın hüquqlarının qorunması və gender bərabərliyi ilə bağlı problemin həllində birbirindən kəskin fərqlənən səviyyələrdə inkişaf edirlər
Müəllif :
Lamiyə Zeynalova
Nəşr tarixi : 2022
Bu məqalədə beynəlxalq hüquq və milli təhlükəsizliyin qarşılıqlı nisbəti ilə bağlı məsələlər nəzərdən keçirilmişdir. Müəllif hesab edir ki, dünyada yeni hüquq qaydasının əsasını güc faktoru deyil, qarşılıqlı hörmətə əsaslanan beynəlxalq münasibətlər, xüsusən də, suveren bərabərlik, əməkdaşlıq, çoxtərəfli diplomatiya, dialoq və s. bu kimi faktorlar təşkil etməlidir. Həmçinin məqalədə Ermənistan-Azərbaycan münaqişəsinin həll olunmamış qalmasının yalnız milli və regional deyil, həm də müəyyən mənada beynəlxalq təhlükəsizlik üçün təhdid təşkil etdiyi əsaslandırılır
Müəllif :
İsmayıl Kəngərli
Nəşr tarixi : 2022
В данной статье рассматривается история внедрения договора лизинга в Азербайджанское законодательство, а также некоторые практические моменты ее становления. Проводиться сравнительный анализ действующего законодательства с предыдущим, регулирующим порядок заключения и исполнения данного договора и рассматривающего его как особый вид услуг. В статье также отмечено, что на практике предпринимались ошибочные попытки подогнать лизинг под договор кредитования, что не отвечает ее правовой природе. По данному вопросу анализируется соответствующее Постановление Конституционного Суда Азербайджанской Республики. В статье проводиться классификация форм договора лизинга и раскрывается ее содержание со ссылкой на законодательство, юридическую литературу, а также судебную практику.
Müəllif :
Шафа Гулиева - Диссертант кафедры международного частного права и европейского права Бакинского государственного университета
Nəşr tarixi : 2021
Kapitalist iqtisadi sistemin ən əsas tələblərindən biri, güclü mülkiyyət hüquqları sistemidir. Mülkiyyət hüquqlarının tərifi, bölüşdürülməsi və qorunması hər bir cəmiyyətin həll etməli olduğu ən vacib məsələlərdən biridir. Azərbaycan Respublikasının Konstitusiyası, Azərbaycanın imzaladığı beynəlxalq konvensiyalara söykənərək, Azərbaycanda mülkiyyət və mənzil hüquqlarını təmin edir. Xüsusi mülkiyyət hüququ, hüquqların hər hansı bir hissəsini sahibinin müəyyən etdiyi qiymətə dəyişdirmək və ya hədiyyə etmək yolu ilə həvalə etmək, icarəyə götürmək və ya satmaq hüququnu əhatə edir. Məqalədə, orijinal konstitusiya mülkiyyəti bəndinin hazırlanmasından və qanunvericilik və konstitusiya təkamülündən soz açılır və göründüyü kimi, Azərbaycanın iqtisadi inkişaf və sosial bölgü hədəflərinə çatmaq üçün cəmiyyətdəki mülkiyyət münasibətlərini yenidən formalaşdırmağa onu daha mütərəqqi etməyə ehtiyac vardır. Bu məqalənin əsas məqsədi mülkiyyət hüquqları ilə bağlı Azərbaycan Respublikasının qanunvericilik bazasının izahını verməkdir. Gəldiyimiz nəticə odur ki, konstitusiyanın mülkiyyət hüquqlarına aid bir sıra hissələrində məzmunla bağlı dəyişikliklər olmalıdır. Bu analizin jurnalistlər, media işçiləri, vətəndaşlar və hüquqşünaslar, habelə mülkiyyət hüquqları ilə əlaqəli hüquqi məsələlərlə maraqlanan vətəndaş cəmiyyəti və hökumət rəsmiləri üçün faydalı olması nəzərdə tutulur.
Müəllif :
Səftər Rəhimli - h.ü.f.d., Bakı Dövlət Universiteti
Nəşr tarixi : 2021
Məqalədə qədim Yunanıstanda müqavilə münasibətlərinin və hüququnun formalaşmasının tarixi, sosial-iqtisadi və hüquqi əsasları, şərtləri, mahiyyəti, öz dövrünə və yerinə görə xarakterik xüsusiyyətləri, sonrakı mərhələdə dünyanın (xüsusilə, qədim Romanın) hüquq düşüncənin və qanunvericiliyin inkişafına təsiri, həmçinin, burada müqavilə sahəsində mövcud olmuş əsas müddəa, norma, institut və formaların məzmunu və meydana gəlmə səbəbləri və tətbiqi təcrübəsi təhlil edilir. Mövzunun araşdırılması üçün müəllif xronoloji ardıcıllığa uyğun olaraq, qədim yunan şəhər-dövlətlərinin (xüsusilə, Afinanın) tarixi-coğrafi, sosial-iqtisadi, dövlət quruluşu, siyasi və hüququ (əsasən, müqavilə ilə bağlı) vəziyyəti ilə əlaqədar məlumatları tədqiqata cəlb etmişdir.
Müəllif :
Eldar Qocayev - hüquq üzrə fəlsəfə doktoru, AMEA-nın Hüquq və İnsan Haqları İnstitutunun doktorantı
Nəşr tarixi : 2021
.jpg)
