Hüquq və İnsan Haqları İnstitutu (İnstitut) dekabrın 6-da Ümummilli Lider Heydər Əliyevin anadan olmasının 100 illiyinə, İnstitutun 25 illik yubileyinə və Beynəlxalq İnsan Hüquqları Gününə həsr olunmuş tədbir keçirmişdir.
Hüquq və İnsan Haqları İnstitutunun İdarə Heyətinin sədri Məhəmməd Quluzadə Məhkəmə-Hüquq Şurasına üzv seçilib.
Hüquq və İnsan Haqları İnstitutunun təşkilatçılığı və BMT-nin İnkişaf Proqramının dəstəyi ilə 2023-cü ilin “Heydər Əliyev ili” elan olunması çərçivəsində “Hüquq və insan haqları virtual kitabxanası”nın ictimaiyyətə açıq təqdimatı keçirilib. Təqdimat Ümummilli Lider Heydər Əliyevin anadan olmasının 100 illiyinə həsr olunub.
31 oktyabr tarixində Zoom platforması üzərindən Dünya ərzaq gününə həsr olunmuş “2022 FAO hüquq mühazirəsinin açılış mərasimi: Heç kim arxada qalmasın. Daha yaxşı istehsal, daha yaxşı qidalanma, daha yaxşı mühit və daha yaxşı həyat” mövzusunda vebinar keçirilmişdir. FAO (BMT-nin Ərzaq və Kənd Təsərrüfatı Təşkilatı) aclığa qalib gəlmək üçün beynəlxalq səylərə rəhbərlik edən ixtisaslaşmış bir qurumdur.
1 noyabr tarixində Hüquq və İnsan Haqları İnstitutunda əməkdaşımız Fərid Ələkbərov tərəfindən Avropa İnsan Hüquqları Məhkəməsinin presedent hüququna aid HUDOC məlumat bazası haqqında təlim keçirilmişdir. Təlim iştirakçılarına HUDOC məlumat bazasının funksional axtarış bölmələri ilə işləmək üçün zəruri məlumatlar verilmiş, daha sonra onlara məlumat bazasında əyani şəkildə praktiki axtarış imkanları göstərilmişdir.
1 noyabr tarixində İnstitutumuzun əməkdaşı İlham Əliyev Beynəlxalq Sülh və Qanunun Aliliyi üzrə Maks Plank Fondunun (MPFPR), Azərbaycan Hüquq Cəmiyyətinin (ALS) birgə təşkilatçılığı və Almaniya Federal Xarici İşlər Nazirliyinin maliyyə dəstəyi ilə “Məhkəmə islahatları prosesində qeyri-hökumət təşkilatlarının rolunun gücləndirilməsi” layihəsi çərçivəsində “Cinayət prosesində prosessual təminatlar” mövzusunda keçirilmiş onlayn müzakirədə iştirak etmişdir.
31 oktyabr tarixində Hüquq və İnsan Haqları İnstitutunun İdarə Heyətinin sədri Məhəmməd Quluzadə və İnstitutun əməkdaşları Azərbaycan Respublikasında hüquq və insan haqları sahəsində fəaliyyət göstərən yerli QHT-lərlə onlayn görüş keçirib. Görüşdə M.Quluzadə QHT nümayəndələrini institutun nizamnaməsində qeyd olunan istiqamətlərlə yaxından tanış etmiş, gələcək planlara aydınlıq gətirmiş, institutun QHT-lərlə hansı istiqamətlərdə əməkdaşlıq edə biləcəyini diqqətə çatdırmışdır.
27 oktyabr 2022-ci il tarixində Hüquq və İnsan Haqları İnstitutu İdarə Heyətinin sədri Məhəmməd Quluzadə Avropa Şurasının Bakı ofisi tərəfindən təşkil edilmiş “Qeyri-kommersiya sektorunda çirkli pulların yuyulması və terrorizmin maliyyələşdirilməsi riskləri” mövzusunda keçirilmiş seminarda iştirak etmişdir. Seminarda Dövlət Təhlükəsizlik Xidməti, Ədliyyə Nazirlyi, Maliyyə Monitorinq Xidməti, Dini Qurumlarla İş üzrə Dövlət Komitəsi və yerli qeyri-hökumət təşkilatlarının nümayəndələri iştirak etmişlər.
28 oktyabr 2022-ci il tarixdə Hüquqi Ekspertiza və Qanunvericilik Təşəbbüsləri Mərkəzinin və Hüquq və İnsan Haqları İnstitutunun rəhbərləri Azərbaycan Respublikası Vəkillər Kollegiyasının təşkil etdiyi tədbirdə iştirak ediblər. Tədbirdə Beynəlxalq Kommersiya Arbitraj Şurasının 1958-ci il Nyu-York Konvensiyasının şərhinə dair Azərbaycan dilində təlimat - “Hakimlər üçün əl kitabı” təqdim edilmişdir. Tədbirdə Vəkillər Kollegiyasının üzvləri, Milli Məclisin deputatı, Ədliyyə Nazirliyinin və müxtəlif dövlət qurumlarının əməkdaşları, xarici ekspertlər, eləcə də hüquqşünaslar və mətbuat nümayəndələri iştirak etmişlər.
“Hüquq və İnsan Haqları İnstitutu”nun elan etdiyi loqo müsabiqəsinin müddəti 10.11.2022-ci il tarixinədək uzadıldı. Müsabiqədə iştirak etmək istəyənlər öz loqo təkliflərini 10.11.2022-ci il tarixinədək info@huquq.org.az e-mail ünvanına göndərə bilərlər. Müsabiqə nəticəsində qalib seçilmiş loqoya mülkiyyət hüququ İnstituta məxsus olacaq (orijinal fayl, rəng kodları və fontlar təqdim edilməklə). Qalib gəlmiş şəxsə 200 manat məbləğində mükafat ödəniləcək. Eyni təşkilat və ya fiziki şəxs tərəfindən maksimum 5 loqonun təqdim edilməsi mümkündür. Institut haqqında ətraflı məlumat - http://huquq.org.az/az/ Bütün iştirakçılara uğurlar arzulayırıq! Diqqət! İnstitut əməkdaşları bu müsabiqədə iştirak edə bilməz.
Hüquq və İnsan Haqları İnstitutunun İdarə Heyətinin sədri Məhəmməd Quluzadə 31 oktyabr 2022-ci il saat 15:00-dan 16:30-a qədər “Zoom” platforması üzərindən Azərbaycan Respublikasında hüquq və insan haqları sahəsində fəaliyyət göstərən yerli QHT-lərlə onlayn formatda görüş keçirəcək. Görüşdə iştirak etmək üçün aşağıdakı linkdən qeydiyyatdan keçməyiniz xahiş olunur. Bu görüşdə yalnız qeydiyyatdan keçmiş şəxslər iştirak edə biləcək. Qeydiyyat üçün son tarix 28.10.2022-ci il, saat 12:00.
25 oktyabr tarixində Hüquq və İnsan Haqları İnstitutunda Maliyyə Tədbirləri üzrə İşçi Qrupunun (FATF) eksperti Ben Evensla görüş keçirilmişdir. Ekspert tərəfindən FATF təşkilatının yaranma tarixi, inkişafı, ölkələrin bu təşkilat qarşısındakı öhdəlikləri, görülən işlər və onların əhəmiyyəti barədə geniş məlumat verildi.Həmçinin ekspert təşkilat tərəfindən “boz” və “qara” siyahıya salınmış ölkələrə tətbiq edilən sanksiyaların effektivliyi və xarici ölkələrin mütərəqqi təcrübəsi nəzərə alınmaqla onların Azərbaycan Respublikasında tətbiqi ilə bağlı tövsiyyələrini də verdi. Əməkdaşlarımız ekspertlə FATF-ın fəaliyyət istiqamətləri, QHT-lərin terror fəaliyyətilə mübarizə mövzusunda ətraflı fikir mübadiləsi apardılar.
İnstitutumuzun əməkdaşı hüquq elmləri doktoru, professor Məhəmməd Nağı oğlu İmanlının “Qarabağ zəfəri: beynəlxalq hüquq və tarixi reallıqlar kontekstində” adlı monoqrafiyası işıq üzü görmüşdür. Monoqrafiya həm bugünkü, həm də gələcək nəsillər üçün Qarabağ probleminin yaranma tarixi, xalqımızın üzləşdiyi problemlər, beynəlxalq hüquq normalarının ciddi surətdə pozulması və münaqişənin beynəlxalq hüquqi aspektlərinin dəqiq öyrənilməsi baxımından böyük əhəmiyyət kəsb edir. Monoqrafiya Azərbaycan və Türkiyə rəhbərlərinin imzaladığı müttəfiqlik haqqında birgə Şuşa Bəyannaməsinin əhəmiyyətindən, bölgənin gələcəkdə sülh və əmin-amanlıq üçün mahiyyətindən bəhs edir.
Bütün hüquqlar qorunur © 2024
Saytı hazırladı : Burncode LLC
