Hüquq və İnsan Haqları İnstitutu publik hüquqi şəxs

Son xəbərlər

ELAN - “Hüquq və İnsan Haqları İnstitutu”nun elan etdiyi loqo müsabiqəsinin müddəti 10.11.2022-ci il tarixinədək uzadıldı

“Hüquq və İnsan Haqları İnstitutu”nun elan etdiyi loqo müsabiqəsinin müddəti 10.11.2022-ci il tarixinədək uzadıldı. Müsabiqədə iştirak etmək istəyənlər öz loqo təkliflərini 10.11.2022-ci il tarixinədək info@huquq.org.az e-mail ünvanına göndərə bilərlər. Müsabiqə nəticəsində qalib seçilmiş loqoya mülkiyyət hüququ İnstituta məxsus olacaq (orijinal fayl, rəng kodları və fontlar təqdim edilməklə). Qalib gəlmiş şəxsə 200 manat məbləğində mükafat ödəniləcək. Eyni təşkilat və ya fiziki şəxs tərəfindən maksimum 5 loqonun təqdim edilməsi mümkündür. Institut haqqında ətraflı məlumat - http://huquq.org.az/az/ Bütün iştirakçılara uğurlar arzulayırıq! Diqqət! İnstitut əməkdaşları bu müsabiqədə iştirak edə bilməz.

2022-10-28 13:17:00

ELAN - Hüquq və İnsan Haqları İnstitutu QHT-lərlə görüş keçirəcək

Hüquq və İnsan Haqları İnstitutunun İdarə Heyətinin sədri Məhəmməd Quluzadə 31 oktyabr 2022-ci il saat 15:00-dan 16:30-a qədər “Zoom” platforması üzərindən Azərbaycan Respublikasında hüquq və insan haqları sahəsində fəaliyyət göstərən yerli QHT-lərlə onlayn formatda görüş keçirəcək. Görüşdə iştirak etmək üçün aşağıdakı linkdən qeydiyyatdan keçməyiniz xahiş olunur. Bu görüşdə yalnız qeydiyyatdan keçmiş şəxslər iştirak edə biləcək. Qeydiyyat üçün son tarix 28.10.2022-ci il, saat 12:00.

2022-10-26 16:14:00

FATF üzrə ekspert Ben Evensla görüş keçirilmişdir

25 oktyabr tarixində Hüquq və İnsan Haqları İnstitutunda Maliyyə Tədbirləri üzrə İşçi Qrupunun (FATF) eksperti Ben Evensla görüş keçirilmişdir. Ekspert tərəfindən FATF təşkilatının yaranma tarixi, inkişafı, ölkələrin bu təşkilat qarşısındakı öhdəlikləri, görülən işlər və onların əhəmiyyəti barədə geniş məlumat verildi.Həmçinin ekspert təşkilat tərəfindən “boz” və “qara” siyahıya salınmış ölkələrə tətbiq edilən sanksiyaların effektivliyi və xarici ölkələrin mütərəqqi təcrübəsi nəzərə alınmaqla onların Azərbaycan Respublikasında tətbiqi ilə bağlı tövsiyyələrini də verdi. Əməkdaşlarımız ekspertlə FATF-ın fəaliyyət istiqamətləri, QHT-lərin terror fəaliyyətilə mübarizə mövzusunda ətraflı fikir mübadiləsi apardılar.

2022-10-26 15:37:00

Əməkdaşımızın “Qarabağ zəfəri: beynəlxalq hüquq və tarixi reallıqlar kontekstində” monoqrafiyası dərc edilib

İnstitutumuzun əməkdaşı hüquq elmləri doktoru, professor Məhəmməd Nağı oğlu İmanlının “Qarabağ zəfəri: beynəlxalq hüquq və tarixi reallıqlar kontekstində” adlı monoqrafiyası işıq üzü görmüşdür. Monoqrafiya həm bugünkü, həm də gələcək nəsillər üçün Qarabağ probleminin yaranma tarixi, xalqımızın üzləşdiyi problemlər, beynəlxalq hüquq normalarının ciddi surətdə pozulması və münaqişənin beynəlxalq hüquqi aspektlərinin dəqiq öyrənilməsi baxımından böyük əhəmiyyət kəsb edir. Monoqrafiya Azərbaycan və Türkiyə rəhbərlərinin imzaladığı müttəfiqlik haqqında birgə Şuşa Bəyannaməsinin əhəmiyyətindən, bölgənin gələcəkdə sülh və əmin-amanlıq üçün mahiyyətindən bəhs edir.

2022-10-25 15:30:00

Əməkdaşlarımız “Avropa məhkəməsi qərarlarının Azərbaycan tərəfindən icrasının gücləndirilməsinə dəstək” layihəsinin təqdimatında iştirak ediblər

21 oktyabr tarixində Avropa Şurasının Bakıdakı Ofisinin təşkilatçılığı ilə “Avropa məhkəməsi qərarlarının Azərbaycan tərəfindən icrasının gücləndirilməsinə dəstək” layihəsi çərçivəsində konfrans keçirilmişdir. Tədbirdə layihənin təqdimatı keçirilmiş, daha sonra “Avropa İnsan Hüquqları Məhkəməsinin qərarlarının icrasında Ali Məhkəmənin rolu”, “Avropa Məhkəməsi qərarlarının üzv dövlətlər tərəfindən icrası sahəsində qabaqcıl təcrübələr”, “Hüquq mütəxəssislərinin davamlı təhsilinin təşkili: nailiyyətlər və çağırışlar” və “İnsan hüquqlarının müdafiəsi mexanizmlərinin fəaliyyətində vəkillərin rolu” mövzularında çıxışlar edilmişdir. Konfransda institutumuzu h.e.d., professor Əli Rzayev və Fərid Ələkbərov təmsil etmişlər.

2022-10-24 14:58:00

İnstitutun İdarə Heyətinin sədri ATƏT-in Vyana ofisində görüş keçirmişdir

20 oktyabr 2022-ci il tarixdə Hüquq və İnsan Haqları İnstitutu İdarə Heyətinin sədri Məhəmməd Quluzadə Avropa Təhlükəsizlik və Əməkdaşlıq Təşkilatının Vyana ofisində İnsan Alveri üzrə Xüsusi nümayəndənin ofisinin əməkdaşı cənab Evan Karr ilə görüşmüşdür. Məhəmməd Quluzadə ATƏT-in nümayəndəsinə İnstitutun yeni fəaliyyəti və gələcək planları haqqında ətraflı məlumat vermişdir. Cənab Karr öz növbəsində insan alveri ilə mübarizə sahəsində ATƏT-in ən son fəaliyyətləri və tədqiqatları haqqında məlumat vermişdir.

2022-10-21 14:42:00

Hüquqşünaslarımız "Kriminalistika" dərsliyinin təqdimatında iştirak ediblər

20 oktyabr 2022-ci il tarixində Bakı Dövlət Universitetinin Hüquq fakültəsi və Azərbaycan Respublikası Ədliyyə Nazirliyi Məhkəmə Ekspertizası Mərkəzinin əməkdaşları tərəfindən hazırlanmış "Kriminalistika" dərsliyinin təqdimatı keçirilib. Bakı Dövlət Universitetində keçirilən kitab təqdimatında çıxış edən universitetin prorektoru Fərda İmanov, hüquq fakültəsinin dekanı Zaur Əliyev, Kriminalistika və məhkəmə ekspertizası kafedrasının müdiri Kamil Səlimov, Cinayət hüququ və kriminologiya kafedrasının müdiri Şəhla Səmədova, Cinayət prosesi kafedrasının müdiri Firuzə Abbasova, Azərbaycan Respublikası Ali Məhkəməsinin hakimi Nigar Rəsulbəyova, Əməkdar hüquqşünas İkram Kərimov və b. "Kriminalistika" dərsliyinin yüksək ixtisaslı hüquq kadrlarının hazırlanmasında, cinayətkarlıqla mübarizənin təkmilləşdirilməsi və daha da gücləndirilməsi sahəsində kriminalistik üsul və tövsiyələrin səmərəliliyinin əhəmiyyətli dərəcədə artırılmasında mühüm rol oynayacağını qeyd ediblər.

2022-10-20 12:45:00

Əməkdaşımız İlham Əliyev Qafqazşünasların III Beynəlxalq Forumunda çıxış edib

19-20 oktyabr tarixlərində Azərbaycan Milli Elmlər Akademiyasının Rəyasət Heyəti və AMEA-nın Qafqazşünaslıq İnstitutunun birgə təşkilatçılığı ilə Bakıda Qafqazşünasların III Beynəlxalq Forumu keçirilmişdir. Forumda İnstitutumuzu hüquq üzrə fəlsəfə doktoru İlham Əliyev təmsil edərək“Vətən müharibəsi və onun hüquqi nəticələri” mövzusunda məruzəçi qismində çıxış edib. Məruzəçi çıxışında qeyd edib ki, Azərbaycan Respublikası göstərilən silahlı münaqişədə beynəlxalq hüququn prinsiplərinə və beynəlxalq ictimaiyyətin rəyinə tam uyğun olaraq, dövlətin ərazi bütövlüyü və toxunulmazlığı mövqeyində qətiyyətlə dayanır. O, bildirib ki,beynəlxalq silahlı münaqişənin dayandırılmasının əsas forması ümumi barışıq haqqında sazişdir.

2022-10-20 12:22:00

Təlimçi əməkdaşlarımız təlim sessiyalarında iştirak ediblər

17-18 oktyabr tarixlərində BMT-nin İnkişaf Proqramının Azərbaycandakı nümayəndəliyinin təşkilatçılığı ilə “Azərbaycanda institusional potensialın gücləndirilməsi vasitəsi ilə insan hüquqlarına əsaslanan yanaşmanın aktuallaşdırılması” layihəsi çərçivəsində “Yerli milli insan hüquqları institutlarının ekspertləri üçün Biznes və insan hüquqları və milli insan hüquqları institutlarının rolu haqqında təlimçilərin təlimi sessiyaları” mövzusunda təlim keçirilib. Təlimin aparıcısı Sloveniyanın Nyu Universitetinin əməkdaşı, hüquq üzrə fəlsəfə doktoru, professor Jernej Letnar Çerniç olmuşdur.

2022-10-19 12:05:00

18 Oktyabr Azərbaycanın Müstəqilliyinin Bərpası Günüdür

18 oktyabr Azərbaycan xalqının tarixinə şərəf və qürur hisslərilə yazılmış əlamətdar bir gündür. SSRİ-nin süquta uğraması nəticəsində Azərbaycan xalqı ikinci dəfə öz dövlət müstəqilliyini yenidən bərpa etdi. 1991-ci il oktyabrın 8-də Azərbaycan Ali Sovetinin növbədənkənar sessiyasında müzakirələr aparılaraq oktyabrın 18-də “Dövlət Müstəqilliyi haqqında” Konstitusiya Aktı qəbul edildi. Konstitusiya Aktı siyasi və iqtisadi münasibətlərin fundamental prinsiplərini, təbii sərvətlərin xalqa mənsub olmasını, mülkiyyətin bütün formalarının bərabərliyini, vətəndaşların seçki hüququnun və çoxpartiyalı sistemin təmin olunmasını özündə ehtiva edib. 1991-ci il oktyabrın 18-dən Azərbaycan müstəqil, suveren bir ölkədir və xalq bu tarixi hər il bayram kimi qeyd edir.

2022-10-18 11:55:00